Gastronomia, kultura-ondarea eta jasangarritasuna ardatz dituen nazioarteko lankidetza, Euskal Herriko, Portugalgo eta Turkiako Lanbide Heziketako ikastetxeen artean.
2026ko urriaren 19tik 23ra, Erasmus+ KA210-VET SEED (Sustainable Eco-gastrotourism and Education Development) Europako proiektuaren lehenengo ikasketa-bisita egin da Istanbulen, Turkian. Mugikortasunean Gasteizko Gamarra Ostalaritza Eskolako, Portugalgo Lousadako ikastetxeko eta anfitrioi izan den Ortaköy Zübeyde Hanım Vocational and Technical Anatolian High School ikastetxeko ikasleek eta irakasleek parte hartu dute.
Zubiri Manteo Merkataritza eta Marketin Sailak ere parte hartzen du proiektuan, komunikazioaren eta emaitzen zabalkundearen arduradun gisa. Eginkizun horren barruan, proiektuaren jardueren, ikaskuntzen eta emaitzen berri ematea eta horiek hezkuntza-komunitatearekin eta gizartearekin partekatzea da gure lana, nazioarteko lankidetza eta jardunbide egokien trukea sustatuz.
Kulturak eta tradizioak partekatuz ikastea
Sukaldaritza-tailer praktikoak izan dira ikasketa-bisitako jarduera nagusietako batzuk. Ikasleek Turkiako gastronomia tradizionala ezagutzeko aukera izan dute, eta Portugalgo zein Euskal Herriko errezetak eta sukaldaritza-teknikak partekatu dituzte. Nazioarteko taldeetan lan eginez, hainbat errezeta prestatu eta dokumentatu dituzte, haien jatorri kulturala, erabilitako osagaiak eta tokiko zein sasoiko produktuen garrantzia aztertuz.
Elikadura-jasangarritasuna ere funtsezko ardatza izan da. Tailerretan elikagaien xahuketa prebenitzea, azpiproduktuak aprobetxatzea, hondakinak murrizteko sukaldaritza-teknikak, birziklapena, konpostajea eta ekonomia zirkularra landu dituzte. Horrez gain, hazi tradizionalekin lotutako ekimenak eta artisau-ogigintza ezagutzeko aukera izan dute.
Istanbul: gastronomia, historia eta kultura
Ikasketa-bisitak Istanbulgo gastronomia- eta kultura-nortasuna ezagutzeko aukera eman du.
Besteak beste, Çinili Hamam historikoa, Kadınlar Pazarı merkatu tradizionala, Espezien Azoka, Kurukahveci Mehmet Efendi kafearen museoa eta Topkapı jauregia bisitatu dituzte. Topkapı jauregian, otomandar gorteko gastronomiaren historia ezagutu dute. Esma Sultan Mansion eraikin enblematikoa ere bisitatu dute, Bosforoko gastronomia-kultura aztertu dute eta Turkiako gastronomia tradizionalaz gozatu dute Pandeli jatetxe historikoan.
Halaber, hazi tradizionalekin egindako artisau-ogiaren elaborazio-tailer batean parte hartu dute. Jarduera horien bidez, gastronomiaren, kultura-ondarearen, turismoaren eta tokiko jarduera ekonomikoaren arteko loturak aztertu dituzte, tradizioak zaintzearen eta jardunbide jasangarriak sustatzearen garrantzia nabarmenduz.
Ikaskuntza partekatua eta nazioarteko lankidetza
Bisita ebaluazio-saio batekin amaitu da. Bertan, ikasleek eta irakasleek egindako lanaren emaitzak partekatu, jardunbide egokiak identifikatu eta ikasitakoa beren ikastetxeetan nola aplikatu aztertu dute.
SEED proiektuak aukera ematen du herrialde desberdinetako ikastetxeen arteko lankidetza sendotzeko, esperientziak trukatzeko eta gastronomiaren zein jasangarritasunaren inguruko ikuspegi berriak lantzeko.
Zubiri Manteoko Merkataritza eta Marketin Sailak komunikazioaren eta zabalkundearen bidez laguntzen du esperientzia horiek ezagutarazten, proiektuaren emaitzak partekatzen eta nazioarteko lankidetzaren balioa hezkuntza-komunitateari eta gizarteari hurbiltzen.
Eskerrak eman nahi dizkiogu bereziki Turkiako anfitrioi-ikastetxeari, eskainitako harreragatik, arretagatik eta eskuzabaltasunagatik. Haien ekarpenari esker, lehenengo ikasketa-bisita esperientzia aberasgarria izan da parte-hartzaile guztientzat.
SEED: ezagutza partekatuz, kulturak lotuz eta etorkizun jasangarriagoa eraikiz.
